اسلام آباد (میپ نیوز) وزیراعظم کے مشیربرائے خزانہ ومحصولات ڈاکٹرعبدالحفیظ شیخ نے کہاہے کہ حکومت پسماندہ طبقے کی بحالی پر خصوصی توجہ دے رہی ہے، اقتصادی ترقی کیلئے نجی شعبہ کی حوصلہ افزائی کی جارہی ہے۔ان خیالات کااظہار انہوں نے کراچی میں اوورسیز انویسٹرز چیمبر کی تقریب سے خطاب کرتے ہوئے کیا۔ان کا کہنا تھا کہ جب حکومت اقتدارمیں آئی توملک مشکل اقتصادی حالات کا سامناکررہاتھا، زرمبادلہ کے ذخائر کم تھے،بیرونی ادائیگیوں میں مشکلات کاسامناتھا، ان حالات میں معاشی بحالی کے لیئے حکومت نے سخت فیصلے کئے۔مشیر خزانہ کا کہنا تھا کہ حکومت نے بچت اورکفایت شعاری کا راستہ اختیارکیاہے اور 2 سالوں میں حکومتی اخراجات میں 5 ہزار ارب روپے کی بچت کی گئی۔گزشتہ مالی سال میں حکومت نے کوئی ضمنی گرانٹ نہیں دی۔انہوں نے کہاکہ کاروبارمیں آسانیوں کیلئے اقدامات کئے جارہے ہیں ، حکومت معاشی ترقی کے لیئے نجی شعبے کی حوصلہ افزائی کر ر ہی ہیں۔ برآمدات کو فروغ دینے کیلئے اقدامات کاسلسلہ جاری ہے، برآمدات کا فروغ حکومت کی ترجیحات میں شامل ہے۔حکومت نے برآمدات میں اضافے کے لیئے متعدد مراعات دیں،اسی طرح کاروبار میں آسانی کے لیئے متعدد پالیسیاں مرتب کی گئیں۔حفیظ شیخ کا کہنا تھا کہ معاشرے کے غریب اورکمزورطبقات کوامدادفراہم کرنا ضروری ہے، حکومت نے پسماندہ طبقے کی بحالی پہ خصوصی توجہ دی ہے۔ کورونا وائرس کی وبا میں غریب طبقے کیلئے خصوصی کیش گرانٹ پروگرام کا آغاز کیا گیا۔انہوں نے کہاکہ کورونا سے نمٹنے کے لیئے پاکستان کے اقدامات کو عالمی سطح پر سراہا گیا۔ کورونا کی وجہ سے مجموعی ترقی کی شرح اور ٹیکس محاصل میں کمی ہوئی ہے۔
